تجربة بالدارجة

إيماجيني نكتب بلوق-بوست بالدارجة الدزيرية؟ وعلاش لالا؟
على من راح نحكي؟ ممممممم؟ خلاص لقيتها، نحكي على الكلمات لي يستعملوها بزّاف العباد، par example كاين عندي واحد فاميلتي يقول بزّاف " راك شايف كيفاش" وكي يزرب يجيبها (راك شاف كش؟) .. المشكلة أنّو يكثّر، تقريبا بعد كل جملة لازم يزيد هاذيك (راك شاف كش)..."اليوم الجمعة لازم نزربوا باش نلحقو الصلاة راك شاف كش؟"، "نروح للسوق نشري المعدنوس ونولّي راك شاف كش؟"، راك شايف كش راك شاف كش...راك شايف كش؟
كاين ثان لي يقول بزاف كلمة (تحير) .. راهي التسعة تاع الصباح ومازالك راقد؟ تحير! برد كيما هذا راك لابس دوميمونش؟ تحير! تحير تحير ، تحرحير تحير؟ تحير!
وكاين لي كيما حالتي يعرف كلمة ولا زوج بالفرونسي تلقاه وين يروح يعاودها (كاشما كان يقولوا يعرف لفخونسي) مثلا عبارة كيما (ce n'est pas la peine (c pas le piene ، كل حاجة مسكين يقول سي با لابان، هاذ الإنسان sure تطّفر فيه في الأعراس والمناسبات، الجماعة تجي تسربي اللحم وهو باش يبيّن روحوا بلي يعرف الفخونسي يقول لهم c pas la piene!
وكاين عباد قتلونا بكلمة "قتلتنا"، تروح ليه تقولّو "صباح الخير" يجاوبك "قتلتنا بصباح الخير" ، تكون لابس جين يقولّك "قتلتنا بالجين"، تجبد التيليفون "قتلتنا بالتيليفون" ، تقول salut يقولّك "قتلتنا بالفخونسي" ، تقول "مرحبا" يقولّك "قتلتنا بالفصحى .. يا أخ العرب" ،
كاين لي يعرف كلمة ولا زوج تاع anglais  تعلمهم من mbc max كيما "شِيتْ" ولا "دامن"، والمسكين في بالو معناها "تبّا لك" كيما تترجمها mbc ، آلور تلقاه كي يزعف "شِت" و كي يتقلق "دامن"!
آيا a la prochaine ان شاء الله (كتبتها صحيحة؟)